एकट्‍याने किंवा मित्रांसोबत फिरायला जाण्याचा बेत असेल तर कर्नाटकातील कुर्ग हे अतिशय योग्य ठिकाण आहे. कारण येथे फिरण्यासाठी आणि बघण्यासाठी भरपूर ठिकाणे आहेत, जी बघण्यासाठी आठवडाभराची सुट्टीही कमी वाटेल. वेगवेगळ्या ऋतूंमध्ये येथला निसर्ग तुम्हाला वेगवेगळा अनुभव देतो. भारतात कॉफीच्या सर्वात जास्त उत्पादनासाठी कुर्ग प्रसिद्ध आहे. चहाच्या बागा, चहुबाजूंनी पसलेलं नैसर्गिक सौंदर्य आणि हिरवीगार जंगले कुर्गला स्वर्गासमान बनवतात असं म्हणण्यास हरकत नाही.

कुर्गमधील भागमंडला, तालकावेरी, निसारगधमा, दुबरे, अबे वॉटर फॉल, इरुपू वॉटर फॉल आणि नागरहोल नॅशनल पार्क ही महत्वाची प्रेक्षणीय स्थळे आहेत. ट्रेकिंगची हौस असणाऱ्यांसाठी पुष्पागिरी आणि ब्रह्मगिरीचा पर्याय सुद्धा आहे. आराम आणि ॲडव्हेंचर असा दुहेरी आनंद घेण्यासाठी पर्यटक कुर्गला भेट देत असतात. त्यामुळेच कुर्गची ॲडव्हेंचर कॅपिटल ऑफ कनार्टक अशी ओळख आहे. माऊंटेन क्लायम्बिंगपासून ते जंगल ट्रेकिंग, राफ्टिंगपासून ते फ्लाइंग, एलिफंट कॅम्पपासून ते फिशिंगपर्यंत सर्वच गोष्टी येथे उपलब्ध आहेत. ऑक्टोबर ते मे महिना हा कुर्गला भेट देण्यासाठी अतिशय योग्य आहे. म्हणून या महिन्यात येथे पर्यटकांची विशेष गर्दी आढळते.

.